Kreu i Aleancës për Shqiptarët, Ziadin Sela, ka komentuar mundësinë e bashkëngjitjes së Arben Taravarit në koalicionin Fronti Evropian, duke e cilësuar këtë temë si të parëndësishme për të personalisht, por me peshë për vetë koalicionin dhe opinionin publik.
“A do t’i bashkohet Taravari Frontit Evropian? Për mua është tema më e parëndësishme. Duhet ta pyesni atë nëse do të jetë pjesë e Frontit Evropian. Ajo që di unë është se ai është tepër kontradiktor në qëndrimet e tij,” u shpreh Sela.
Duke përdorur një gjuhë të drejtpërdrejtë dhe simbolike, Sela theksoi se Taravari nuk mund të shihet si faktor unifikues, përkundrazi:
“Ai ka simbolikën e shkatërruesit, ndërsa unë kam simbolikën e ndërtuesit në skenën politike.”
Sipas Selës, Fronti Evropian duhet ta vëzhgojë me kujdes çdo lëvizje dhe vendim të tillë, sepse një qasje e paqartë ndaj figurave të tilla mund të dëmtojë koherencën e frontit.
“Nuk është qëndrim politik të thuash ‘do bashkëpunoj me të gjithë’ ose ‘do marr nga të gjithë’. Kjo nuk është strategji, por konfuzion politik.”
Kjo deklaratë vjen në një kohë kur spekulimet për një afrim të mundshëm të Taravarit me Frontin Evropian janë intensifikuar, pas prishjes së bashkëpunimit të tij me Selën dhe pjesës tjetër të Aleancës për Shqiptarët.