Ish-kryeministri turk Ahmet Davutoğlu ka reaguar ashpër ndaj njoftimeve për mundësinë e njohjes së Somalilandit nga Izraeli, duke e cilësuar këtë si një lëvizje strategjike me pasoja të rënda për rajonin dhe botën islame.
Në një deklaratë të gjatë, ai tha se njohja e Somalilandit “nuk është një zhvillim i izoluar”, por pjesë e një projekti më të gjerë për “copëtimin e shteteve islamike dhe neutralizimin e fuqive kryesore rajonale”. Sipas tij, përmes kësaj lëvizjeje Izraeli synon të sigurojë akses në portin strategjik të Berberës në Gjirin e Adenit, duke krijuar presion mbi Egjiptin dhe Arabinë Saudite në Detin e Kuq, si dhe mbi Turqinë, e cila ka prezencë të rëndësishme ushtarake dhe politike në Somali.
Davutoğlu e lidhi zhvillimin me Marrëveshjet e Abrahamit, të cilat i quajti “projekt imperialist” që rrezikon Afrikën dhe botën islame, ndërsa e cilësoi situatën “fyerje” në një kohë kur lufta në Gaza vazhdon.
Ai kërkoi një reagim të menjëhershëm diplomatik nga Ankaraja dhe paraqiti një listë masash konkrete, përfshirë:
• nisjen e bisedimeve direkte midis Mogadishut dhe autoriteteve të Somalilandit në Turqi,
• emërimin e një të dërguari special turk në rajon,
• koordinim të ngushtë me Egjiptin, Arabinë Saudite dhe Emiratet e Bashkuara Arabe,
• angazhim me SHBA-në, Britaninë, Bashkimin Afrikan, Organizatën e Bashkëpunimit Islamik dhe Ligën Arabe për të kundërshtuar çdo hap drejt njohjes së pavarësisë së Somalilandit.
Davutoğlu rikujtoi ndërhyrjen e mëparshme të Turqisë në vitin 2013, kur Ankaraja ndërmjetësoi bisedime mes palëve dhe, sipas tij, pengoi përpjekje të ngjashme për ndarjen e Somalisë.
Ai përfundoi duke paralajmëruar se mosreagimi ndaj këtij zhvillimi do të sillte “përgjegjësi historike” për vendet që zgjedhin të qëndrojnë pasive.