Zëdhënësi i Qeverisë së Kosovës, Përparim Kryeziu tha Zyra e Kryeministrit i është drejtuar Gjykatës Themelore me këtë kërkesë përmes një letre
Prishtinë
Zyra e Kryeministrit të Kosovës i ka kërkuar Gjykatës Themelore në Prishtinë që ta obligojë Prokurorinë Speciale që të marrë dëshminë e kryeministrit të Kosovës, Albin Kurti, brenda zyrës së tij në ndërtesën e Qeverisë në Prishtinë, transmeton Anadolu.
Zëdhënësi i Qeverisë së Kosovës, Përparim Kryeziu tha se Zyra e Kryeministrit i është drejtuar Gjykatës Themelore me këtë kërkesë përmes një letre.
Më 19 shkurt, Prokuroria Speciale njoftoi se i ka kërkuar Gjykatës Themelore që ta urdhërojë kryeministrin Kurti që të paraqitet në cilësinë e dëshmitarit në një rast të hapur lidhur me dyshimet për keqpërdorime me rezervat shtetërore, pasi Kurti kishte refuzuar dy ftesat e mëparshme që të paraqitej në prokurori.
Në letrën dërguar Gjykatës, Zyra e Kryeministrit përsërit qëndrimin e shprehur më parë se Kurti nuk i ka refuzuar kërkesat për të dhënë dëshmi, por ai ka kërkuar që dëshminë ta japë në ambientet e Qeverisë.
“Kërkesa e tij që kjo të ndodhë në ambientet e Zyrës së Kryeministrit është plotësisht e arsyeshme dhe nuk mund të interpretohet si shmangie nga drejtësia. Në dritë të kësaj, me respekt kërkojmë nga Gjykata që të obligojë Prokurorinë Speciale të marrë dëshminë e kërkuar, brenda Zyrës së Kryeministrit”, thuhet në letër.
Prokuroria Speciale e kishte ftuar për herë të parë më 10 dhjetor 2024 kryeministrin në detyrë për të dhënë dëshmi brenda këtij institucioni më datën 16 dhjetor 2024. Kurti nuk i është përgjigjur kësaj ftese, duke u deklaruar se është i gatshëm të japë dëshmi, por ka theksuar se prokurorët mund ta intervistojnë në zyrën e tij, një praktikë që, sipas tij, është ndjekur edhe më parë.
Kryeministri në detyrë, Albin Kurti është i thirrur si dëshmitar në lëndën që ka të bëjë me veprën penale – keqpërdorimi i pozitës apo autoritetit zyrtar, apo më konkretisht me rezervat shtetërore, ku janë të përfshirë si të dyshuar një afarist dhe dy zyrtarë të Ministrisë së Tregtisë dhe Industrisë.