Doli nga stacioni policor i Autokomandës, ndërsa lirimin e tij kolegët gazetarë, shokët dhe familjarët e pritën me duartrokitje.
Duke treguar plagët që ka marrë nga arrestimi, mohoi se ka sulmuar forcat policore, të cilat po intervenonin në konfliktin që kishte nisur mes policisë dhe tifozëve.
“U publikuan lajme se po bastiset shtëpia ime, që nuk është e vërtet, u publikuan lajme që është gjetur një armë pa u potencuar se ajo armë është me leje dhe dolën edhe ministri sa më treguan, nuk e kam lexuar saktë, më gjykoi me status Facebook, duke thënë se kam sulmuar polic, le ta provojnë, le ta dëshmojnë, unë prej nesër nuk e punoj këtë punë”, tha Furkan Saliu, gazetar.
Ministri i brendshem Pance Toshkovski, në bazë të asaj që ka parë nga incizimet ka gjykuar se së paku ka pasur pengim të një zyrtari në kryerjen e detyrës zyrtare nga gazetari.
“Në përputhje me shënimet zyrtare që janë dorëzuar nga ana e policëve të cilët kanë qenë të sulmuar, i njëjti ka sulmuar person zyrtarë, sipas asaj që unë pash në incizim i cili ishte dorëzuar deri te unë, unë personalisht pash pengim të personit zyrtar i cili po vepronte zyrtarisht”, tha Pançe Toshkovski, ministër i Brendshëm.
Ndryshe Saliu bashkë me disa persona të tjerë u arrestua gjatë një ndeshje të ligës së tretë, kur tifozët u përfshinë në konflikt me forcat policore.