Kandidati për president nga radhët e BDI-së, Bujar Osmani, ftoi në një iftar të përbashkët kundërkandidatët e tij Pendarovskin, Siljanovska-Davkovën, Arben Taravarin dhe Maksim Dimitrievskin. Mirëpo ftesa për iftar nuk kishte për dy kandidatët e tjerë Stevço Jakimovskin, i cili së fundmi u fut në listën e zezë amerikane dhe Biljana Vankovsën, kandidate nga radhët e Levicës. Vankovska nuk e di arsyen mirëpo dyshon nëse Osmani po bën lista të zeza personale për atë se kë do të ftojë e kë jo.
Osmani fton kundërkandidatët në iftar, por jo edhe Jakimovskin dhe Vankovskën
“Mësova se z.Bujar Osmani nuk më ka ftuar në iftar së bashku me të tjerët, ku planifikojnë të bisedojnë për zgjedhjen e presidentit europian. Si duket Osmani po bën “lista të zeza” të tijat, për të dëshiruarit dhe të padëshiruarit. Për Jakimovskin është e qartë (gjendet në listën e zezë amerikane), por për mua ndoshta di diçka që unë nuk e di. U bëftë mirë iftari atyre që do të pranojnë, unë si duket nuk i përkas asaj shoqërie”, shkroi Vankovska.
Për kandidatin tjetër të paftuar në iftar, Stevço Jakimovskin, kjo sjellje e Osmanit nuk është kulturore. Shprehet se këto iftare bëhen sipas nevojës, gjegjësisht për fushatë zgjedhore.
“Unë as që prita të më ftojë z.Osmani. Ai është mësuar ashtu të shërbejë dhe të sillet. Për mua ajo sjellje është e pakulturë por ajo flet për të dhe jo për mua. Thotë ca flluska se kjo është një veprim pro europian ose s’e di çka. Unë kam bërë iftare me qytetarët e komunitetit islam në komunën e Karposhit me kënaqësi dhe respekt. Është e qartë se ata i bëjnë sipas nevojës, në rastin konkret fushatën zgjedhore”, tha Jakimovski.
Kandidati i VLEN-it për president, Arben Taravari, tha që nuk ka asnjë problem të ulet në një tryezë për iftar me Osmanin dhe të tjerët, por shtoi se agjenda e tij është shumë e ngjeshur dhe ka caktuar datat paraprakisht.
“S’ka asnjë problem. Në parim jam për t’u ulur bashkë të gjithë kandidatët por shpresoj që të mos përputhet me ndonjë datë sepse kemi caktuar datat dhe agjenda është e përplot. Në qoftë se gjejmë një termin të përbashkët unë jam për atë që të organizojmë një iftar të përbashkët”, vlerëson Taravari.
Qëllimi i iftarit të përbashkët, siç ka shkruar Osmani, ishte që të bashkëbisedojnë për fushatë pozitive, konstruktive dhe për garë idesh për një president europian.