Kryetari i Komunës së Tetovës, Bilall Kasami, ka njoftuar sot për firmosjen e projektit bazë për ndërtimin e rrjetit të kanalizimit fekal në fshatin Xhepçisht, në bashkëpunim me Ministrinë e Ambientit Jetësor dhe Planifikimit Hapësinor.
Së bashku me ministrin Izet Mexhiti, në ambientet e ministrisë, u nënshkrua marrëveshja për realizimin e këtij projekti me vlerë prej 30 milionë denarësh. Kryetari Kasami theksoi se ky investim nuk është vetëm një projekt infrastrukturor, por një hap i rëndësishëm drejt përmirësimit të cilësisë së jetës në zonat rurale.
“Një projekt që nuk është thjesht tubacion, beton e dokumente teknike, por një hap i domosdoshëm për dinjitetin urban të banorëve tanë, për mjedisin, për shëndetin publik dhe për zhvillimin e qëndrueshëm të zonave tona rurale.
Ky investim i rëndësishëm vjen si rezultat i punës tonë të përditshme, përkushtimit dhe bashkëpunimit institucional sepse kur prioritet është qytetari, asnjë lagje, asnjë fshat, asnjë vendbanim nuk mbetet pas.
Vazhdojmë me projektet, jo me fjalë, por me punë konkrete, sepse Tetova që duam ndërtohet çdo ditë me punë, me vizion dhe me vendosmëri.
Xhepçishti meriton më mirë, dje premtuam, sot po punojmë!”, ka shkruar Kasami.