Në xhaminë Al-Aksa në Kudsin Lindor të pushtuar u fal namazi i xhenazes në mungesë për Ismail Haniyeh, kreun e Byrosë Politike të Hamasit që u vra në Iran, transmeton Anadolu. Si çdo të premte policia izraelite u vendos me një numër të madh trupash dhe barriera hekuri përreth zonës së Qytetit të Vjetër, ku ndodhet edhe xhamia Al-Aksa. Policia kontrolloi identitetin e palestinezëve që erdhën në xhaminë Al-Aksa për faljen e xhumasë dhe i ktheu ata, veçanërisht të rinjtë.
Imami i xhamisë Al Aksa, Sheikh Ekrima Sabri u lut për Haniyen në hutben e tij të xhumasë. Besimtarët që ndodheshin në Aksa iu përgjigjën lutjes së Sheikh Ekrima me tekbire. Sheikh Ekrima Sabri në fjalimin e tij që mbajti në hutben (ligjëratën) e xhumasë tha: “Ata që jetojnë në Bejtul-Makdis dhe ata që janë në minberin e xhamisë Al Aksa e pranojnë Ismail Haniyen si dëshmor në praninë e Allahut. Allahu e mëshiroftë”.
Pas namazit të xhumasë, u fal namazi i xhenazes në mungesë me qëllimin për “dëshmorët e mbarë botës islame”. Pavarësisht kufizimeve të policisë izraelite, namazin e xhumasë në Al-Aksa e falën 30 mijë muslimanë. Që nga 7 tetori 2023 kur filluan sulmet në Rripin e Gazës, policia izraelite zbaton kufizime serioze që kanë penguar mijëra njerëz të falen në Al-Aksa.