Prishtinë, 6 Korrik 2025 – Gazetari nga Kosova, Fitim Çeku, ka bërë një deklaratë të fortë në një postim të tij të fundit, duke pretenduar se nuk do të ketë emërime të reja për ambasadorë amerikanë as në Kosovë e as në Maqedoninë e Veriut, deri në shkarkimin e plotë të stafit aktual diplomatik në këto dy shtete.
Sipas Çekut, këto zhvillime lidhen me përfshirjen e zëvendëskryeministrit të Maqedonisë së Veriut, Artan Grubi, në listën e zezë amerikane, për shkak të një takimi të tij me njerëz të afërt të ish-presidentit amerikan Donald Trump.
“Nuk do të ketë ambasador të ri amerikan në Kosovë derisa të shkarkohet i gjithë stafi i ambasadës,” shkruan Çeku.
“I njëjti fat i pret edhe Ambasadën e Maqedonisë së Veriut, të cilët lobuan për interesat e [Nikolla] Gruevskit dhe e futën Artan Grubin në Listën e Zezë, vetëm sepse ai u takua me njerëzit e Donald Trump për të parandaluar përgjimet e paligjshme nga Maqedonia në Kosovë.”
Gazetari pretendon se përgjimet ilegale të autoriteteve maqedonase në territorin e Kosovës kishin për qëllim destabilizimin e vendit, ndërsa shton se më shumë detaje do të bëhen publike në ditët në vijim.
Kush është Fitim Çeku?
Fitim Çeku është një gazetar i njohur nga Kosova, i cili, sipas burimeve të ndryshme mediatike, ka lidhje të ngushta familjare dhe miqësore me Richard Grenellin, ish-emisar special i SHBA-së për dialogun Kosovë-Serbi dhe një nga figurat e afërta me Donald Trump.