Kryeministri i Kosovës, Albin Kurti, ka dalë hapur kundër përpjekjeve të Iranit për t’u pajisur me armë bërthamore, duke theksuar se siguria ndërkombëtare kërkon më pak armatim të tillë dhe jo më shumë. Në një deklaratë të qartë, Kurti u shpreh se programet për armë bërthamore, posaçërisht kur zhvillohen nga shtete autoritare, përbëjnë një rrezik serioz dhe urgjent për gjithë njerëzimin.
“Siguria ndërkombëtare ka nevojë për më pak armatim nuklear dhe jo më shumë bomba bërthamore që vënë në rrezik gjithë njerëzimin. Posaçërisht kur shtete autoritare zhvillojnë programe për pajisje me armatim nuklear, kjo çështje bëhet urgjente dhe alarmuese,” deklaroi Kurti.
Ai konfirmoi mbështetjen e plotë të Republikës së Kosovës për qëndrimin e ShBA-ve dhe Bashkimit Evropian ndaj programit bërthamor të Iranit, duke e cilësuar këtë si një qëndrim të domosdoshëm për ruajtjen e paqes dhe sigurisë globale.
“ShBA-të janë aleati ynë kryesor, partneri i pazëvendësueshëm dhe miku special. Republika e Kosovës është e përcaktuar fuqishëm në mbrojtje të vlerave demokratike dhe euro-atlantike. ShBA-të janë superfuqia demokratike që duhen mbështetur,” theksoi më tej Kurti.
Qëndrimi i kryeministrit vjen në një kohë kur tensionet ndërkombëtare rreth programit bërthamor të Iranit janë rritur, dhe vendet perëndimore kërkojnë masa të përbashkëta për parandalimin e përhapjes së armëve të shkatërrimit në masë.