Arben Taravari nga koalicioni VLEN ka shpalosur disa nga emrat e funksionarëve që do të jenë në qeverinë e ardhshme. Taravari, tha se ai do të jetë ministër i shëndetësisë.
“Ministër i ekologjisë do të jetë Izet Mexhit, ministër për qeverisje të mirë dhe transparencë do të jetë Arben Fetai i cili është lindur dhe jeton në Bruksel do të kthehet në vend që të udhëheqë me ministrinë, Fatmir Limani do të jetë ministër i politikës sociale, ministër i ekonomisë pritet sot të vendoset se cili do të jetë”, ka thënë Taravari për Kanal5.
Kjo do të jetë hera e parë që liderët e psrtive shqiptare në Maqedoninë e Veriut, të marin pjesë në kabinetin qeveritar, konkretisht me rastin e Taravarit si kryetar i ASH-së, që ende kërkon verifikim në gjykatë dhe Mexhitit si kryetar i Lëvizjes Demokratike, shkruan Zhurnal. Këtu në njëfarë mënyre mund të përfshihet edhe kryeparlamentari i ri, Afrim Gashi, sado që posti i tij nuk i takon pushtetit ekzekutiv. E njëjta gjë mund të thet edhe për Bilall Kasamin, sepse ai në vitin 2021 u bë kryetari i parë i një partie politike, pas Rufi Osmanit, që u zgjodh në post poashtu të rëndëishëm, siç është posti i kryetarit të Tetovës, të cilit iu rikthye edhe pasi u zgjodh deputet në zgjedhjet e fundit parlamentare. Deri tani një gjë e tillë nuk ka ndodhur, sepse kryetarët e partive kanë preferuar të delegojnë “njerëz të sigurt” në pozita qevritare dhe pozita tjera të rëndësishme, si ajo e kryetarit të Kuvendit, por asnjëherë nuk kanë pranuar vetë të “lagen” në ujërat qeveritare, shkruan Zhurnal.
Këtë nuk e ka bë as Nevzat Halili, kryetari i parë i PPD-së, as Abdurrahman Aliti, as Arbër Xhaferi, e as Menduh Thaçi. Opinioni shpeshherë ka kërkuar prej tyre që të marin përgjegjësinë dhe të bëhen pjesë e ekzekutivit, sepse do të shtonin në këtë mënyrë seriozitetin e shqyrtimit të çështjeve që kanë të bëjnë me votuesit e tyre, por një gjë e tillë nuk ka ndodhur. Sqarim zyrtar asnjëherë nuk ka pasur, por në takime jozyrtare me gazetarë, jo rrallëherë liderët e partive shqiptare janë arsyetuar se nuk marin poste, sepse u nevojitet më tepër kohë për t’u kujdesur për hallet e partisë.
Ndryshe, qeveria e re mes VMRO-DPMNE-së dhe koalicionit VLEN dhe ZNAM pritet të formohet pas festës së Bajramit, më 19 ose 20 qershor, paralajmëroi Izet Mexhiti nga VLEN.
Në Qeverinë Mickoski, sipas njoftimeve, në duart e koalicionit VLEN do të jenë Ekonomia, Eurointegrimet, Ekologjia (Izet Mexhiti, njëkohësisht zv/kryeministër), Politika sociale (Fatmir Limani) dhe Qeverisja e mirë (Arben Fetai).
Sipas burimeve jozyrtare, në eshalonin e tretë, koalicionit VLEN, do t`i takojnë 400 poste udhëheqëse, përfshirë edhe ato në nivel të njësive rajonale në mbarë vendin.