Lidhja Europiane për Ndryshim kritikon presidentin Pendarovski për mungesën e veprimeve konkrete në disa çështje thelbësore për Maqedoninën e Veriut.
“E kemi dëgjuar presidentin Pendarovski të flasë shumë herë për vlera multietnike, por kur duhej të dëshmohej se beson vërtet në ato vlera, e dëshmoi të kundërtën. Ai reagoi ashpër kundër himnit e flamurit shqipar në tubimet e shqiptarëve, madje nuk hezitoi ta quajë shovinist një veprim të tillë, por nuk e dëgjuam askund të reagojë kundër ndonjë veprimi të vërtetë shovinist, siç ishin së fundi protestat dhe rezistenca për hapjen e paraleleve shqipe në Komunën e Çashkës.
LEN shtoi se Presidenti Pendarovski është dëgjuar shpesh duke folur kundër korrupsionit, por në heshtjen e tij dhe mungesën e interesit për zgjerimin e listës së zezë me funksionarë nga Maqedonia e Veriut, sidomos pas dekretit të tij në ndryshimet e Kodit Penal, ku amnistoi krimin dhe korrupsionin shtetëror, ai ka humbur bindjen e publikut. Ky mosveprim i tij e bën atë të ngjajë më shumë me paraardhësit e tij se sa me një president që ka vendosur të qëndrojë në krye të luftës kundër korrupsionit.
“E dëgjuam të flasë për vlera demokratike dhe integrim, por nuk i’a dëgjuam zërin të thotë një fjalë për çështjen e anëtarit të opozitës në KSHZ, që është fundament për zgjedhje të lira dhe demokratike. Ai heshti edhe ndaj raportit skandaloz të progresit për RMV-në, si dhe ndaj kritikave të Komisionit Europian për keqpërdorim të flamurit të BE-së, që flet shumë për integrimin e vendit në BE. Ai ka pasur plot fjalë për drejtësinë, por ka heshtur ndaj presionit që i bëhet Kryetares së Gjykatës Supreme” shtuan nga LEN.
Deklarata përmbyllet me një vlerësim se presidenti Pendarovski ka qenë një president i dështuar në praktikë dhe se populli duhet të ketë një alternativë. Lidhja Europiane për Ndryshim shpall që do të kandidojë një kandidat të saj në zgjedhjet presidenciale, duke sugjeruar se BDI-ja po fshihet pas kandidatit të LSDM-së dhe se të dy partitë duhet të mbajnë përgjegjësi bashkërisht në zgjedhje. /Telegrafi/