Edhe kryetari i degës së Tetovës në një vijë me Arben Fetain
Përçarjet brenda Aleancës për Shqiptarët (ASH), nën drejtimin Arben Taravarit, po thellohen çdo ditë e më shumë. Sot, një tjetër figurë e rëndësishme i është bashkuar radhës së atyre që kundërshtojnë vendimin e Taravarit për t’u bashkuar me Bashkimin Demokratik për Integrim (BDI) në zgjedhjet lokale dhe për t’u larguar nga koalicioni qeverisës aktual.
Bëhet fjalë për kryetarin e degës më të madhe të ASH-së, atë të Tetovës, Arif Selami, i cili duket se nuk ndan të njëjtin mendim me Taravarin. Kjo u bë e dukshme edhe në një fotografi të shpërndarë nga Gadaf Uzeiri, ku në vend të Selamit ishte i pranishëm sekretari i degës, Emir Huseini.
Ndërkohë, Arif Selami është shfaqur aktiv në postimet e zëvendëskryeministrit Arben Fetai, duke i dhënë mbështetje të qartë qëndrimit të tij – një sinjal i fortë se edhe ai është kundër bashkëpunimit me BDI-në dhe mbështet qëndrimin pro-VLEN-it.
Kjo situatë e re thellon ndarjet brenda ASH-së, duke ngritur pikëpyetje mbi drejtimin dhe qëndrueshmërinë e partisë në prag të zgjedhjeve lokale të tetorit.