Nga “vizitat zyrtare” tek fotot me tinejxherë – politika e mashtrimit me kartolinë
Është bërë modë në politikën shqiptare të rajonit që disa “liderë” provincash t’u hipin avionëve për në SHBA, futen në ndonjë seminar të hapur të Partisë Republikane (zakonisht evente publike me qasje të lirë), bëjnë ndonjë foto me ndonjë figurë periferike të së djathtës amerikane – dhe më pas kthehen në Ballkan duke e shitur këtë si “marrëveshje strategjike” ose “bashkëpunim ndërkombëtar”.
E vërteta është shumë më banale: në këto salla ka më shumë kamera sesa vendimmarrës. Shumë nga ata që dalin në foto janë tinejxherë amerikanë që marrin pjesë në panele të hapura, ndonjë praktikant a student politik, dhe të vetmit që kanë ndonjë titull real janë aty për të bërë propagandë për CPAC-in – jo për të lidhur aleanca me ndonjë parti nga Maqedonia apo Shqipëria që as nuk dinë t’i shqiptojnë.
Këta politikanë tanë s’kanë lidhje me vendimmarrjen amerikane. Ata thjesht blejnë akses në një ambient, shtyjnë ndonjë karrige që të duken në foto, e pastaj manipulojnë opinionin publik në vendin e tyre duke e kthyer një turizëm politik në “arritje historike”.
Kjo nuk është diplomaci. Është teatër. Dhe është fyerje për çdo qytetar që pret zgjidhje reale për problemet e veta. Nuk ka marrëveshje. Nuk ka bashkëpunim. Ka vetëm një fotoreportazh të shtrenjtë që shitet si investim politik