Dhjetëra infermiere dhe personel teknik që mbi një dekadë kanë statusin e punës të pazgjidhur, dolën në protestë përpara Spitalit Klinik të Tetovës për të shprehur revoltën. Përveç se s’kanë vendime pune, infermierët pohojnë se kanë tre muaj pa rroga.
“Gjashtë vite jemi me kontratë në vepër. Për tre muaj hyjmë tash që edhe s’kemi rroga. Na është premtuar po asgjë prej premtimit”.
“Unë jam nëntë vite, dhjetë do i bëj, me kontratë në vepër. Katër vite kam qenë pa kontratë pa rrogë pa asgjë. Tash s’kemi më as kontrata. Kanë kontribuar edhe kolegët tjerë, kemi qenë edhe te modulari por asgjë. Nëse nuk na zgjidhet statusi do të vazhdojmë me protestë, sepse ndërrohen ministra, ndërrohen drejtor, neve vetëm premtime na japin asgjë nuk zgjidhet”.
“Më shumë se 100 jemi. Duhet të dalin edhe kolegët që janë më shumë se dhjetë vite”.
“Jam pa rrogë, pa vendim pa kontratë asgjë. Një vit pata kontratë tash asgjë. Dy vite jam në punë, një vit pata kontratë një vit jam pa rrogë”.
Pas protestës përpara urgjencës në Tetovë, u drejtuan për takim edhe tek drejtori i Spitalit Klinik të Tetovës. Edhe pse kërkuan zgjidhje për statusin e tyre, morën vetëm premtim se drejtoria do të angazhohet për zgjidhjen e statusit të tyre. Sipas drejtorit Agim Berisha, marrja e vendimeve nuk varet nga spitali por nga ministria e Shëndetësisë dhe ajo e Financave.
“E drejta e tyre për protestë është e drejtë demokratike, por si grup është dashur të më njoftojnë. Unë pres brenda muajit të ardhshëm të zgjidhet kjo çështje”, tha Agim Berisha.
Infermierët dhe stafi teknik i spitalit paralajmëruan se do të vazhdojnë me protesta çdo ditë, deri në zgjidhjen e përhershme të statusit të tyre.