Në një veprim që përkujton skenarin e një viti më parë, kryetari i njërës pjesë të Aleancës për Shqiptarët, Arben Taravari, ka njoftuar sot mbajtjen e një mbledhjeje të jashtëzakonshme të Kuvendit të Partisë, për ditën e nesërme, 23 maj 2025, ora 19:30 në sallën e ish-Komitetit në Kumanovë. Thirrja, e bërë me urgjencë vetëm një ditë para zhvillimit, ka nxitur reagime dhe komente për përpjekje për të mbajtur kontrollin ndaj strukturave partiake përballë zhvillimeve të fundit brenda opozitës shqiptare.
Ngjarja rikthen kujtesën e një situate të ngjashme në maj të vitit 2024, kur Taravari organizoi po ashtu një Kuvend Partie në mënyrë të ngutshme, për t’i paraprirë Kuvendit të Ziadin Selës në përpjekje për të ruajtur pozitën e kretarit të partisë dhe pozitat e mbështetësve të tij të ngushrë brenda partisë. Sot, historia duket se përsëritet – këtë herë për t’i paraprirë një tjetër mbledhjeje të paralajmëruar: Kuvendit që pritet të organizohet nga krahu i Arben Fetait.
Në ftesën e publikuar nga vetë Taravari thuhet se iniciativa vjen nga 2/3 e anëtarëve të Kuvendit të Partisë dhe se mbledhja thirret në bazë të nenit 64 të Statutit Partiak. Rendi i ditës përfshin:
1. Diskutim për situatën aktuale politike në vend
2. Të ndryshme
Ky zhvillim ndodh në një kohë kur Aleanca për Shqiptarët është përfshirë nga tensione të brendshme dhe largime të njëpasnjëshme nga figura kyçe të partisë, përfshirë edhe përkrahës të mëhershëm të Taravarit që tani pozicionohen përkrah Arben Fetait dhe koalicionit VLEN.
Nxitimi për thirrjen e Kuvendit “sot për nesër” shihet si një përpjekje për të mbajtur nën kontroll mbështetësit brenda strukturës partiake dhe për të penguar mobilizimin e krahut të kundërt. Rasti përforcon përshtypjen se në Aleancë po zhvillohet një betejë e brendshme për legjitimitetin politik dhe drejtimin e ardhshëm të subjektit.