Gjenerali amerikan në pension, Wesley Clark, sot do të jetë për vizitë në Kosovë. Ai do të takohet me kryetarin e LDK-së, Lumir Abdixhiku, i cili do t’ia ndajë dekoratën “Ibrahim Rugova”.
“Në orën 09:00, në Selinë Qendrore, kryetari i Lidhjes Demokratike të Kosovës me bashkëpunëtorë pret në takim gjeneral Wesley Clark. Kryetari Abdixhiku po ashtu gjeneralit Clark i ndan Dekoratën dr. Ibrahim Rugova, për rolin historik dhe kontributin e tij për çlirimin e Kosovës”, thuhet në njoftimin e LDK-së.
Clark shërbeu si Komandant Suprem i Aleatëve në Europë i NATO-s nga viti 1997 deri në vitin 2000, duke komanduar Operacionin e Forcave Aleate gjatë luftës në Kosovë.
Ai kaloi 34 vjet në ushtrinë amerikane, duke marrë shumë dekorata ushtarake, disa tituj nderi dhe Medaljen Presidenciale të Lirisë.