Ish zv/kryeministri për Çështje Ekonomike, Fatmir Bytyqi në “Daily Click” në TV21 tha se qeveria e re po manipulon me rritjen lineare të pensioneve. Bytyqi thotë se pensionistët gjithsesi se do të kishin rritje sipas metodologjisë së harmonizimit, dhe se sipas tij, diferenca tani është 1000 denarë.
“Rritje në shtator patjetër se do të kishte, sepse do të kishim harmonizim të pensioneve, ja po e them publikisht një pjesë e kategorisë së pensionistëve do të marrin realisht, ndoshta në konton e tyre 2500 denarë, por diferenca mes asaj që do e merrnin gjithsesi, dhe asaj që sot e marrin, është 1.000 denarë, për një pjesë të kategorive, për një pjesë të pensionistëve diferenca është zero”, tha Bytyqi, i cili theksoi se me zhbërjen e sistemit të harmonizimit të pensioneve me pagën mesatare, respektivisht me vetëm rritje lineare, rrezikohet që pushteti në të ardhmen fare mos të rrisë pensionet.
Ndryshe, Qeveria aktuale vendosi për rritje lineare të pensioneve për 5000 denarë. Faza e parë prej 2500 denarëve do të fillojë nga shtatori i këtij viti, ndërsa faza e dytë plus 2500 denarë nga muaji mars.