Mesazhi i Josep Borrell për Bujar Osmanin merr peshë të veçantë në klimën politike aktuale
Në një kohë kur kryeministri dhe partia opozitare VMRO-DPMNE po intensifikojnë sulmet ndaj Bujar Osmanit dhe Bashkimit Demokratik për Integrim (BDI), mesazhi i dërguar nga Josep Borrell – ish-Përfaqësues i Lartë i Bashkimit Evropian për Punë të Jashtme dhe Politikë të Sigurisë – merr një rëndësi të veçantë.
Ky nuk është thjesht një mesazh përkrahjeje ndaj një kandidati lokal, por një sinjal i qartë politik dhe diplomatik, që tejkalon kufijtë e komunës së Çairit dhe vetë Maqedonisë së Veriut, shkruan Flaka Media.
Në videomesazhin e tij, Borrell vlerëson aftësitë udhëheqëse të Osmanit, duke theksuar veçanërisht dëgjimin, ndërtimin e urave dhe aftësinë për të gjetur zgjidhje – cilësi që ai i konsideron thelbësore jo vetëm në diplomaci, por edhe në qeverisjen vendore.
Sipas Borrell, përvoja ndërkombëtare e Osmanit dhe njohja e tij me institucionet evropiane janë një garanci për qytetarët se fondet, investimet dhe mundësitë që vijnë nga Bashkimi Evropian do të jenë të prekshme në nivel lokal.
Ky mesazh bie ndesh me retorikën e pushtetit aktual, e cila shpesh ka synuar të margjinalizojë figurat udhëheqëse shqiptare dhe rolin e tyre në zhvillimet politike dhe institucionale të vendit.