Maqedonia e Veriut është në Europë dhe duhet të jetë pjesë e BE-së dhe e meriton integrimin e plotë euroatlantik, tha ambasadorja e SHBA-ve Anxhela Ageler në intervistë për TV21. Megjithatë shton se sfidat që i sjell ky obligim për ndryshimet kushtetuese duhet të plotësohen. Për deklaratat e partive politike shqiptare se për ta prioritet janë ndryshimet kushtetuese, e pastaj formimin e qeverisë, Ageler tha se kjo mund të ndodhë menjëherë pas zgjedhjeve.
“Kam dëgjuar disa opsione të ndryshme. Do të shohim se si do të jetë pas zgjedhjeve”, tha Anxhela Ageler.
-A mund të realizohet kjo?
“Besoj se po. Ka precedentë. Nuk ka pasur me dekada të tëra, por ka pasur shembuj kur qeveri teknike kanë miratuar amendamente. Nga përvoja ime mësova se këtu gjithçka është e mundur”, u shpreh Ageler.
Sipas Agelerit, e ardhmja e shtetit do të përcaktohet në këto zgjedhje dhe i thirri qytetarët që t’i dëgjojnë me vëmendje premtimet e partive.
-Me vëmendje dëgjoni se si e përshkruajnë vizionin e tyre për të ardhmen sepse kjo është e rëndësishme për qytetarët. Çfarë më tregojnë, si do të duket e ardhmja jonë? Më 8 maj do të votojnë të gjithë. Por çfarë do të jetë më 9 dhe më 10 maj?” tha ambasadorja.
Ageler foli edhe për temën e pashmangshme për futjen e zyrtarëve në listën e zezë, duke thënë se në 9 muajt e fundit SHBA-të kanë vendosur më shumë persona në listën e zeze se që nga pavarësia. Por në vend edhe pse vazhdimisht flitet për nivelin e lartë të korrupsionit deri më tani askush nuk ka marrë përgjegjësi. Ageler tha se ata në fakt janë vjedhës për të cilët Prokuroria dhe gjyqësori deri më tani duhej të ndërmerrnin masa e jo t’u lejojnë që të hyjnë në të gjitha sektorët e shoqërisë dhe pushtetit.
“Nga ky shtet varet se çfarë do të ndodhë me ta. Edhe nga liderët e Maqedonisë së Veriut. Nëse diplomatët amerikanë kanë arritur që të sigurojnë informacione dhe prova, atëherë munden edhe hetuesit, prokurorët, dhe kushdo tjetër nga policia apo gjyqësori në shtet mund t’i sigurojnë të njëjtat prova”, u shpreh ajo.
Por pse SHBA-të nuk i ndajnë këto prova me organet kompetente në Maqedoni dhe në atë mënyrë ta ndihmojë vendin në zbulimin e rasteve të këtilla të korrupsionit të lartë, Ageler tha se këtë nuk e lejojnë ligjet amerikane për privatësi./TV21