Rusia ka shtuar lëvizjen për të drejtat e komunitetit LGBTI+ në listën e organizatave ekstremiste dhe terroriste, njoftuan sot media shtetërore.
Masa është në përputhje me një vendim të Gjykatës së Lartë ruse nëntorin e kaluar se aktivistët LGBTI+ duhet të shpallen ekstremistë, duke bërë që aktivistët homoseksualë dhe transgjinorë të thonë se kanë frikë se kjo mund të çojë në arrestim dhe ndjekje penale.
Agjencia Rosfinmonitoring është përgjegjëse për listën, e cila ka autoritetin të ngrijë llogaritë bankare të më shumë se 14 mijë individëve dhe subjekteve të përcaktuara si ekstremistë dhe terroristë.
Lista është e larmishme, duke përfshirë Al-Qaedan, gjigantin e teknologjisë amerikane Meta dhe bashkëpunëtorët e liderit të ndjerë të opozitës ruse Alexei Navalny.
Lista tani përfshin gjithashtu “lëvizjen sociale ndërkombëtare LGBTI+ dhe njësitë e saj organizative”, njoftoi agjencia shtetërore e lajmeve RIA. Gjatë dekadës së fundit, nën presidentin rus, Vladimir Putin, Rusia ka shtrënguar masat kundër shprehjes së orientimit seksual dhe identitetit gjinor.
Gjithashtu janë miratuar ligje që ndalojnë promovimin e marrëdhënieve seksuale “jotradicionale” dhe ndalojnë ndryshimin e gjinisë ligjore ose mjekësore. /Telegrafi/