Në një reagim lidhur me dëshminë e sotme të ish-ambasadorit amerikan Christopher Hill në Gjykatën e Hagës, profesori i filozofisë politike, Blerim Latifi, ka theksuar se nga kjo dëshmi del një e dhënë shumë e rëndësishme: Sllobodan Millosheviqi kishte varur shpresat për dështimin e Marrëveshjes së Rambujesë tek bindja se “shqiptarët nuk mund të bashkohen për asgjë.”
Sipas Latifit, kjo bindje e Millosheviqit nuk ka qenë pa bazë historike, pasi shpeshherë në të kaluarën shqiptarët kanë humbur vetëkontrollin dhe unitetin për shkak të përçarjeve të brendshme.
“Në Rambuje dhe në Vjenë kjo u shmang, dhe si rezultat Kosova u bë e lirë dhe shtet i pavarur,” ka shkruar Latifi.
Ai paralajmëron se në vitet e fundit ky “defekt moral”, siç e quan ai, është rikthyer rrezikshëm në politikën e brendshme kosovare.
“Fatkeqësisht, në vitet e fundit ky defekt moral, në të cilin historikisht kanë llogaritur armiqtë tanë, është rikthyer rrezikshëm në politikën tonë. Prandaj kemi mbetur në vendnumëro, duke i konsumuar krejt energjitë në delegjitimimin e njëri-tjetrit,” ka shtuar ai.
Latifi e sheh këtë si një nga pengesat kryesore për ecjen përpara të vendit, duke kujtuar se momentet më të rëndësishme të historisë shqiptare janë arritur vetëm kur është ruajtur bashkimi përtej ndasive politike.