Kompania gjermane e industrisë së mbrojtjes, Rheinmetall AG, ka hapur zyrtarisht fabrikën më të madhe për prodhimin e municioneve në Evropë.
Kjo fabrikë gjendet në Unterlüß dhe fillimisht do të fokusohet kryesisht në prodhimin e predhave të artilerisë kalibër 155 mm, i cili është një standard i forcave të NATO-s.
Vetëm këtë vit do të prodhohen 25.000 copë të këtij municioni, ndërsa në vitin 2027 janë planifikuar të prodhohen 350.000 predha të tilla.
Në ceremoninë e përurimit të fabrikës ishte dhe Sekretari i Përgjithshëm i NATO-s, Mark Rutte. Ai theksoi rëndësinë strategjike të këtij investimi për sigurinë evropiane, sidomos në kontekstin e tensioneve në rritje në lindje të kontinentit.
Fillimisht fabrika do të prodhojë predha por është parashikuar që më vonë të zgjerojë aktivitetin me prodhimin e armëve raketore, çka do të forcojë ndjeshëm kapacitetet teknologjike dhe operacionale të kompanisë.
Në vijim të këtij zgjerimi, Rheinmetall ka njoftuar edhe planin për ndërtimin e një fabrike të re në Ukrainë, me synimin për të krijuar një rrjet të integruar mbrojtjeje në nivel evropian. Kjo nismë synon të thellojë bashkëpunimin mes vendeve anëtare të NATO-s dhe partnerëve rajonalë.
Për modernizimin dhe prodhimin janë investuar në këtë fabrikë rreth 500 milionë euro, bën të ditur Rheinmetall. Në këtë fabrikë për momentin punojnë rreth 3000 punonjës, por parashikohet që të punësohen edhe rreth 500 punonjës të tjerë.
/Fahri Cani/