Pas pagesës prej 90 mijë denarësh nga Komuna e Tetovës, Xhevat Xhemaili shfaqet në pushime në vendlindje
Xhevat Xhemaili, mërgimtari për të cilin u raportua më herët se kishte përfituar 90,000 denarë nga Komuna e Tetovës, është rikthyer këto ditë për pushime në vendlindje. Lajmi u rindez pasi kryetari i komunës, Bilall Kasami, publikoi një foto me Xhemailin në rrjetet sociale, vetëm disa javë pas pagesës që kishte shkaktuar polemika.
Dokumenti financiar i publikuar më parë në platformën qeveritare “Open Finance” dëshmonte qartë pagesën e bërë më 14 maj 2025, me përfitues Xhevat Xhemailin, ndërsa si institucion pagues figuron Komuna e Tetovës.
Në atë kohë, opinioni publik reagoi ndaj faktit që pagesa iu dha një mërgimtari që nuk ushtron aktivitet profesional në Maqedoni, ndërsa zyrtarë të komunës kishin dhënë si justifikim “kontributin që ai ka dhënë për komunën”.
Tani, me shfaqjen publike të Xhemailit në Tetovë dhe afërsinë e tij të hapur me kryetarin Kasami, pyetjet e vjetra marrin frymë të re:
Për çfarë u pagua kjo shumë? Cili ishte roli konkret i Xhemailit për të justifikuar fondet publike? Apo ishte thjesht një shpërblim personal pa bazë ligjore?
Deri më tani, Komuna e Tetovës nuk ka ofruar ndonjë dokument kontraktual, vendim zyrtar apo raport pune që të sqarojë për çfarë është dhënë kjo shumë.