Shkup, 22 korrik 2025 – Përpjekja e deputetit të VLEN-it, Bekim Qoku, për të relativizuar përmbajtjen e raportit të Parlamentit Evropian mbi Maqedoninë e Veriut është rrëzuar me fakte nga analisti Sefer Selimi, i cili ka reaguar ashpër pas statusit të Qokut në Facebook.
Në postimin e tij, Qoku pretendon se raporti i PE-së për periudhën 2023–2024 pasqyron vetëm periudhën kur BDI ishte në qeveri dhe jo zhvillimet e fundit politike. Por sipas Selimit, kjo është një përpjekje e dështuar për të manipuluar opinionin dhe për të ikur nga përgjegjësia.
“E di që e vërteta dhemb, posaçërisht kur atë e konfirmon shumica dërmuese e Parlamentit Evropian,” shkruan Selimi, duke e përballur Qokun me faktin se raporti përfshin gjysmën e vitit 2024 – periudhë në të cilën Qeveria aktuale, e votuar edhe nga vetë Qoku, është në pushtet.
Selimi përmend disa pika kyçe që rrëzojnë pretendimet e Qokut:
• Stoilkoviç, një figurë pro-serbe, mik i afërt i Aleksandër Vulinit dhe i sanksionuar nga SHBA e Britania, është emëruar zv.kryeministër me votat e deputetëve të VMRO-së dhe të partnerëve shqiptarë, përfshirë Qokun.
• Kredia hungareze me financim kinez u garantua nga Viktor Orbán përpara se Mickoski të bëhej zyrtarisht kryeministër.
• Aleanca strategjike me Hungarinë është shpallur nga qeveria aktuale, jo nga ajo paraprake që kishte vetëm marrëdhënie protokollare.
• Raporti i PE-së përmend rrezikun e rritjes së ndikimit rus, hungarez dhe serb, duke alarmuar për rrëshqitjen e qartë të RMV-së drejt orbitës së “botës serbe”.
“Mos e gënjeni veten por merrni përgjegjësinë që u takon,” përfundon Selimi, duke e akuzuar Qokun për hipokrizi dhe shtrembërim të fakteve.
Në vend të shmangieve, Selimi i kërkon klasës politike shqiptare në Maqedoni të përballet me realitetin: rrëshqitja drejt projekteve gjeopolitike serbo-ruse nuk është më retorikë, por tashmë është e dokumentuar në raportet ndërkombëtare – me bekimin e votës së deputetëve që sot përpiqen të lajnë duart.