Struga u bë sërish epiqendër e artit dhe dialogut kulturor me edicionin e pestë të festivalit “Struga Fest”, një ngjarje që po kthehet në traditë të rëndësishme për qytetin dhe më gjerë.
I pranishëm në këtë gjysmë-jubile ishte Ambasadori i Shqipërisë në Maqedoninë e Veriut, Denion Meidani, i cili vlerësoi rolin e kulturës si ura më e fuqishme e bashkimit mes popujve dhe brezave. Në fjalën e tij, ambasadori tha: “Kultura është gjuha që na flet të gjithëve njësoj, dhe festivale si ky i japin Strugës zërin e saj të veçantë në hartën kulturore të rajonit. Dje, në Strugë, liqeni kumbonte shqip. Inva Mula është krenari kombëtare!”
Në mbrëmjen e veçantë morën pjesë emra të njohur si sopranoja Inva Mula dhe pianisti Genc Tukiqi, të cilët sollën emocione të veçanta për publikun.
Përmes mbështetjes së vazhdueshme të nismave kulturore, Ambasada e Shqipërisë vijon të forcojë miqësinë dhe lidhjet mes komuniteteve shqiptare dhe maqedonase nëpërmjet artit dhe dialogut ndërkulturor.
