Skandali me mosrespektimin e të drejtave ligjore të punëtorëve në Komunën e Zhelinës dhe Shkollën Fillore “Pashko Vasa” në Grupçin sa vjen e thellohet. Ish-mësimdhënësi Mehdi Memeti, tre vite pas daljes në pension, ende nuk ka marrë dy pagat mesatare që i takojnë me ligj, si pjesë e kompensimit të parashikuar në Ligjin për Arsimin Fillor dhe Marrëdhëniet e Punës.
Edhe pse procesin gjyqësor e ka fituar në Gjykatën Themelore në Tetovë dhe lënda tashmë ndodhet në procedurë përmbarimore, drejtësia vazhdon të mungojë. Sipas Memetit, edhe përmbaruesit nuk po veprojnë, duke ngritur dyshime serioze për ndikime politike dhe mungesë të vullnetit institucional.
“Shteti është i kapur dhe i korruptuar deri në palcë! Kam trokitur në të gjitha institucionet – Inspektorati i Punës, Inspektorati i Arsimit, Komisioni Antikorrupsion, Avokati i Popullit – por asgjë. Askush nuk lëviz as gishtin”, – shprehet Memeti në një deklaratë të hapur për opinionin publik.
Sipas tij, pushteti qendror dhe ai komunal vazhdojnë të ushtrojnë presion psikologjik ndaj qytetarëve, duke e keqpërdorur autoritetin si një “pronë personale”, ndërsa pengojnë edhe organet e policisë financiare të bëjnë kontroll apo revizion në komunë dhe shkollë.
“Kush janë ata mafiozë që e pengojnë policinë financiare të bëjë punën? Përgjigjja është e thjeshtë: politikanët lokalë dhe qendrorë, si të kaluarit ashtu edhe të tashmit. Ata janë mbi ligjin dhe përbuzin qytetarin”, – shton ai.
Memeti thekson se nuk është rasti i vetëm – janë shumë të pensionuar në Komunën e Zhelinës të cilëve u janë shkelur të drejtat elementare ligjore dhe, më keq, dinjiteti njerëzor.
“Sot politika e injoron qytetarin, por nesër kërkon votën e tij me arrogancë. Siç duket, për ta vetëm interesat personale vlejnë”, thotë ndër të tjera në reagimin e tij.
Duke përfunduar me fjalët e Migjenit: “Ah, si nuk kam një grusht të fortë e t’i mëshoj malit që s’bën zë”, Memeti paralajmëron se do të vazhdojë të luftojë për të drejtën e tij dhe të tjerëve, duke dokumentuar çdo padrejtësi dhe injorim shtetëror ndaj qytetarit.
