Rusia paralajmëron SHBA-të: Mos ndërhyni ushtarakisht në Iran – rrezikohet destabilizimi i Lindjes së Mesme
Tensionet në Lindjen e Mesme kanë marrë një tjetër dimension diplomatik, pasi Rusia i ka bërë thirrje Shteteve të Bashkuara që të mos ndërmarrin asnjë ndërhyrje ushtarake ndaj Iranit, duke paralajmëruar për pasoja të rënda në rajon.
Zëvendësministri i Jashtëm rus, Sergei Ryabkov, në një prononcim për agjencinë Interfax nga Forumi Ekonomik Ndërkombëtar i Shën Petersburgut, u shpreh se çdo përfshirje ushtarake e Uashingtonit në një konflikt me Iranin do të ishte “jashtëzakonisht e rrezikshme” dhe do të destabilizonte seriozisht Lindjen e Mesme.
“Ne i bëjmë thirrje SHBA-ve që të përmbahen nga çdo hap ushtarak ndaj Iranit. Një veprim i tillë do të kishte pasoja të paparashikueshme për të gjithë rajonin,” – deklaroi Ryabkov.
Kjo deklaratë vjen në një moment kur tensionet mes SHBA-ve dhe Iranit janë rritur ndjeshëm, pas një sërë zhvillimesh në rajon që kanë ngjallur shqetësime për një përshkallëzim të mundshëm ushtarak.
Rusia, si aleate e Iranit dhe aktore kyçe në politikën rajonale, ka ritheksuar vazhdimisht rëndësinë e zgjidhjeve diplomatike dhe ka kundërshtuar çdo përpjekje për përdorim force në çështjet ndërkombëtare.
Pekini dhe disa vende të tjera në rajon gjithashtu kanë bërë thirrje për qetësi dhe vetëpërmbajtje, ndërsa komuniteti ndërkombëtar mbetet në ankth për zhvillimet e mëtejshme.