Maqedonia po përballet me një krizë serioze demografike, e cila po thellohet vit pas viti.
Të dhënat e publikuara nga Enti Shtetëror i Statistikës tregojnë një rënie të vazhdueshme të numrit të lindjeve të gjalla gjatë tri dekadave të fundit. Në vitin 1994, numri i lindjeve ishte mbi 31 mijë. Që atëherë, trendi ka qenë kryesisht në rënie. Pas vitit 2000, numri i fëmijëve të lindur ra nën 25 mijë, ndërsa në periudhën 2008–2014, falë masave stimuluese për lindjen e “fëmijës së tretë”, u shënua një stabilizim i lehtë dhe një rritje modeste e natalitetit.
Megjithatë, pas vitit 2014 situata është përkeqësuar ndjeshëm. Pas ardhjes në pushtet të qeverisë së re, e cila kishte promovuar sloganin “Erdhi jeta”, numri i lindjeve ka shënuar një rënie të pandalshme. Deri në vitin 2024, numri i foshnjave të lindura ka rënë nën 17 mijë, duke arritur minimumin historik prej vetëm 16.061 lindjesh.
Ekspertët e demografisë dhe sociologët e shohin këtë si pasojë të një sërë faktorësh: emigrimi masiv i të rinjve, pasiguria ekonomike, standardi i ulët i jetesës dhe mungesa e politikave të qëndrueshme familjare.
Nëse trendi aktual vazhdon, Maqedonia rrezikon të përballet me pasoja serioze afatgjata: mungesë të fuqisë punëtore, plakje të popullsisë dhe presion të madh mbi sistemin pensional dhe atë shëndetësor.