Shkup, Qershor 2025 – Deputetja e Aleancës për Shqiptarët, Ilire Dauti, ka reaguar me tone të forta dhe ironike ndaj një prej bashkëthemeluesve të koalicionit VLEN, pa ia përmendur drejtpërdrejt emrin, por me nënkuptime të qarta se i drejtohet, Arben Taravarit.
Përmes një statusi në rrjetet sociale, Dauti e akuzon ish-bashkpartiakun për hipokrizi dhe mungesë koherence politike, duke kujtuar se ai ishte në qeverisje përkrah Izet Mexhitit për një vit rresht, por sot bën akuza ndaj të njëjtëve persona të cilët i mbronte.
“Pesë mandate në Çair me mbi 150 objekte të ndërtuara në të zezë, Izet Mexhiti dhe shoku i tij i kishin edhe para një viti, kur ti e përçave Aleancën për Shqiptarët për të shkuar me ta në koalicion,” shkruan Dauti.
Ajo i kujton se gjatë bashkëqeverisjes, kur ajo ngrinte shqetësime në Komisionin për Shëndetësi – siç ishte mungesa e gjuhës shqipe në propozim-ligje apo largimi i drejtuesve shqiptarë – përballej me akuza të pabaza prej tij.
“Më thoshe: ‘U bëre BDI’. E ja pra, shumë shpejt, vetëm pas një viti. Është shumë e qartë se unë BDI nuk u bëra, por ti horr para botës po,” shkruan Dauti me një gjuhë të prerë dhe thumbuese.
Deputetja e përmbyll reagimin me një paralajmërim të qartë për qytetarët dhe skenën politike shqiptare:
“Druajuni politikanëve pa formë politike, sepse ata që janë të ndërtuar, kudo që shkojnë dinë të jenë vetvetja.”
Ky reagim i Dautit vjen pas deklaratave të fundit nga Taravari, i cili ka nisur të kritikojë figurat që deri vonë i kishte partnerë brenda koalicionit VLEN – një zhvillim që ka nxitur dyshime për koherencën dhe sinqeritetin e qëndrimeve të tij politike.