E propozuara nga Lëvizja Vetëvendosje për kryetare të Kuvendit të Kosovës, Albulena Haxhiu, ka deklaruar se Albin Kurti i ka votat e nevojshme për formimin e qeverisë.
E pyetur se përse ato vota nuk po përdoren për ta zgjedhur atë si kryetare të Kuvendit edhe pas 30 dështimeve, Haxhiu u shpreh se “kështu është situata për momentin dhe nuk mund të bëjmë publike pse ne themi kështu.”
“Unë e di që kryeministri i ka votat. Qasi soj është situata për momentin dhe nuk mund të bëjmë publike pse ne themi kështu. Unë mendoj që pikërisht për këtë opozita s’na voton.”, tha ajo.
Haxhiu tha se partitë e deritashme opozitare e dinë që Vetëvendosje i ka votat për Qeverinë Kurti 3.
Haxhiu po ashtu është shprehur skeptike se Gjykata Kushtetuese do të mund të zgjidhë ngërçin institucional që ka pamundësuar konstituimin e Kuvendit.
“Nuk kam besim se Gjykata Kushtetuese përmes një vendimi do të na japë rrugë për zgjidhje. Çështja është se nuk ka objekt”, tha Haxhiu në RTK.
Ajo theksoi se kërkesa e dorëzuar nga AAK në Kushtetuese nuk ka bazë të mjaftueshme për shqyrtim, pasi mungon një vendim të Kuvendit që do të mund të kontestohej.
“Nuk ka një vendim të miratuar nga Kuvendi që të mund të konsiderohet si objekt i ankesës për Gjykatën Kushtetuese”, shtoi Haxhiu, duke lënë të kuptohet se zgjidhja e bllokadës aktuale kërkon një vullnet të ri politik dhe jo vetëm ndërhyrje juridike.