Kryetari i Komunës së Çairit, Visar Ganiu, së bashku me qytetarë dhe disa funksionarë të Lëvizjes Demokratike, ka organizuar një aksion për mbledhjen e mbeturinave në territorin e komunës. Sipas Ganiut, kjo nismë u ndërmor për shkak të mosveprimit të Qytetit të Shkupit, i cili sipas tij, nuk po e përmbush detyrimin për pastrimin e Çairit, edhe pse banorët janë taksapagues të rregullt.
“Mbeturinat nuk po mblidhen nga Qyteti i Shkupit, ndërkohë që çairasit janë taksapagues. Kjo është një padrejtësi e madhe dhe një lloj ekocidi që po i bëhet popullit tonë,” deklaroi Ganiu.
Ai tha se Çairi meriton të jetë i pastër dhe nuk do të lejohet që kjo situatë të vazhdojë në heshtje.
“Ne jemi të zhytur në bërllog. Por nuk do të rrimë kështu. Populli do të reagojë dhe do të japë përgjigje, sepse nuk jemi qytetarë të dorës së dytë. Çairi meriton dinjitet dhe pastërti,” shtoi kryetari i komunës.
Si akt simbolik proteste, mbeturinat e mbledhura do të dërgohen përpara ndërtesës së Qytetit të Shkupit, për t’i kujtuar institucionit përgjegjësinë që ka ndaj të gjithë qytetarëve pa dallim.