Zyrtarë të shumtë policorë të njësive të specializuara të Policisë ë Kosovës janë parë sot në Kaçanik.
Të njëjtit raportohet se janë duke realizuar një aksion të dytë, e që lidhet me vrasjen e rreshterit policor Muhamed Lika.
Në aksion po marrin pjesë edhe policë nga njësia anti-terorrizëm, ku u bastisën disa lokacione, u sekuestruan prova e dëshmi materiale si dhe u arrestuan disa persona.
Hetimet raportohet që janë të lidhura me vepra penale si “Vrasje e rëndë”, “Pjesëmarrje në grupe terroriste” dhe “Rekrutim për qëllime terroriste”.
Deri më tani në hetimin që po bëhet për vrasjen e policit Lika janë arrestuar shtatë persona të dyshimtë të cilëve u është caktuar masa e paraburgimit prej një muaji.
Në lidhje me këtë aksion nuk ka pasur ende një konfirmim zyrtar derisa duhet përkujtuar që të arrestuarit në aksionin e parë të mbajtur javën që shkoi ishin përfshirë më parë në shpërndarjen e pamfleteve të shumta islamike.
Të njëjtit realizonin edhe video të shumta në të cilat bënin thirrje për mos-respektim të demokracisë, të zgjedhjeve e të tjera.
Sipas informacioneve që ishin bërë publike tashmë të burgosurit në këtë rast ishin arrestuar edhe për vepra të kryera më parë, një prej tyre për dhunim e të tjerë që dyshohet se janë përfshirë në djegien e objektit të Gjykatës së Ferizajt- dega në Kaçanik.
Një nga të arrestuarit ishte pjesë e FSK-së dhe një tjetër është djali i një zyrtari policor.