Ministri i Punëve të Brendshme të Kosovës, Xhelal Sveçla, ka njoftuar arrestimin e njërit prej personave të përfshirë në sulmin e dhunshëm ndaj pjesëtarëve të KFOR-it në Zveçan. Në incidentin e rëndë, i ndodhur vitin e kaluar, disa ushtarë të KFOR-it mbetën të lënduar rëndë, ndërsa disa prej tyre pësuan pasoja të përjetshme.
Përmes një statusi publik, ministri Sveçla theksoi vendosmërinë e institucioneve për të sjellë para drejtësisë çdo person që ka cenuar rendin kushtetues dhe sigurinë publike.
“Asnjë kriminel e terrorist nuk do ta ndjejë lirinë për aq kohë sa ka cënuar rendin tonë kushtetues, punën e institucioneve tona, detyrën e zyrtarëve tanë e personelit ndërkombëtar. Mbi ta do të veprohet pa asnjë kompromis, siç presim që edhe drejtësia të veprojë në këtë linjë,” u shpreh ministri.
Ai shtoi se ky arrestim është vetëm një hap në procesin e pandalshëm të kapjes së të gjithë atyre që kanë marrë pjesë në sulmet kundër paqes dhe rendit.
“Republika jonë nuk ka qenë dhe nuk do të jetë kurrë zonë e rehatisë për kriminelë e terroristë,” përfundoi Sveçla.
Operacionet për identifikimin dhe ndjekjen e personave të tjerë të përfshirë në ngjarje po vazhdojnë me mbështetjen e plotë të institucioneve të drejtësisë dhe bashkëpunimit ndërkombëtar.