Paneli Zgjedhor për Ankesa dhe Parashtresa (PZAP) ka refuzuar si të pasafatshme ankesën e Lëvizjes Vetëvendosje për anulimin dhe përsëritjen e votimit jashtë vendit.
Sipas vendimit të PZAP-së, LVV kishte pretenduar se më 5 mars 2025, gjatë përmbylljes së numërimit dhe rinumërimit të votave, vëzhguesit dhe komisionerët e saj kishin konstatuar parregullsi të shumta.
Në ankesën e dorëzuar, LVV ka theksuar se rreth 1,700 persona në listën e votuesve jashtë vendit ishin regjistruar me e-mail adresa të përdorura më shumë se katër herë, në disa raste deri në 22 herë.
PZAP ka sqaruar se ankesa është shpallur e pasafatshme, pasi LVV kishte mundësi të paraqiste këtë shqetësim në momentin kur e kishte konstatuar shkeljen.
Gjithashtu, sa i përket listës së votuesve, PZAP thekson se LVV nuk ka dorëzuar ndonjë ankesë që nga certifikimi i saj në janar, duke humbur kështu afatet ligjore.
Ndërkohë, më 4 mars 2025, Komisioni Qendror i Zgjedhjeve (KQZ) ka përfunduar numërimin e votave të ardhura me postë nga jashtë Kosovës.
Sipas të dhënave të publikuara në platformën zyrtare, rezultatet tregojnë se Vetëvendosje ka marrë shumicën e votave nga diaspora me 51.57% (31,963 vota), e ndjekur nga LDK me 30.55% (18,933 vota), PDK me 9.48% (5,878 vota) dhe koalicioni AAK-Nisma me 3.23% (2,000 vota).
Votimi nga diaspora është realizuar në dy forma: përmes postës dhe me votim fizik në ambasada e konsullata.
Nga 104,924 shtetas të regjistruar për votim jashtë vendit, 84,600 kanë zgjedhur të votojnë me postë, ndërsa 20,324 me votim fizik në përfaqësitë diplomatike.
Zgjedhjet parlamentare të 9 shkurtit 2025 ishin të gjashtat që nga shpallja e Pavarësisë së Kosovës më 17 shkurt 2008.