Nëna e tashmë të ndjerit, Faton Hajrizi sot në Institutin e Mjekësisë Ligjore (IML) ka parë dhe e ka identifikuar trupin e tij.
Edhe pse u tha se IML-ja do të pres disa raporte nga Serbia, me kërkesë të familjarëve të Hajrizit dhe prokurorit, komisioni i IML-së ka vendosur që sot të përfundoj autopsinë.
“Pasi nuk ka shpresë për raportin e autopsisë nga Serbia. Me kërkesë të familjarëve edhe urdhrin e prokurorit, po kryhet sot autopsia e trupit të pajetë të Faton Hajrizit”, ka thënë një burim për Telegrafin.
Ndryshe, trupi i pajetë i Faton Hajrizit ka arritur sot në orët e hershme të mëngjesit në Kosovë.
Avokati i familjes Hajrizi, Arianit Koci para mediave konfirmoi se misioni tashmë është kryer, dhe se trupi i është dorëzuar organeve përgjegjëse në Kosovë.
Faton Hajrizi u vra më 19 korrik në afërsi të kufirit mes Serbisë dhe Bosnjës. Një ditë më herët, ai dyshohet se ka vrarë një polic serb dhe ka plagosur një tjetër.
Ai ishte arratisur nga Qendra Korrektuese e Smrekonicës më 6 korrik.