Shkaqet por edhe përgjegjësia për disfatën e madhe të LSDM-së në zgjedhjet në të cilat partia fitoi vetëm 18 mandate është tema e debatit të kongresit të partisë. Rezultati i keq e hapi kutinë e Pandorës që rezultoi me përçarje të plotë brenda partisë që është edhe tema kryesore e kongresit të sotëm, fillimi i të cilit pritej mbi një orë për shkak të mungesës së kuorumit. Kryetari në largim i partisë Dimitar Kovaçevski para fillimit tha se pret debat të hapur për të gjitha çështjet e hapura brenda partisë.
“Pres që të bisedohet në mënyrë konstruktive dhe të hapur për të gjitha çështjet që ndikuan në rezultatin e zgjedhjeve të fundit por edhe të zgjedhjeve të 2021 sepse atëherë nuk u mbajt kongres për llogaridhënie, kështu që delegatët do të kenë për çfarë të bisedojnë. Gjithsesi se anëtarët e kryesisë do të kenë ekspoze të tyre veçmas, forumi i greve dhe anëtarët e tjerë të kryesisë. Mendoj se ky kongres do të jetë me sukses prej të cilit LSDM-ja duhet të dalë me e fortë, më e bashkuar dhe të hyjë në procesin e finalizimit të zgjedhjes së kryetarit të ri dhe kryesisë së re”, tha Dimitar Kovaçevski – kryetar i partisë në largim.
Edhe nënkryetari i partisë në largim Fatmir Bytyqi pret se pas kongresit partia do të jetë më e bashkuar.
“Na pret periudha e zgjedhjeve brendapartiake, mendoj se kjo është pikë kthese e partisë, andaj kjo ditë është shumë e rëndësishme për mua. Ka vetëm një ndryshim të statutit dhe kjo ka të bëjë me zgjedhjen e kryetarit, zgjedhje të tjera jo, do të lëmë që kryesia e re t’i bëjë”, u shpreh Fatmir Bytyqi – nënkryetar i partisë në largim.
Kryesia e re duhet të zgjidhet pas datës së 30 qershorit, pasi të zgjidhet kryetari i ri i partisë. Për këtë funksion kandidatë janë Venko Filipçe, Sllavjanka Petrovska, Jovan Despotovski dhe Aleksandar Bajdevski.