Në Shtëpinë Muze të Nënë Terezës në Shkup sot u promovua libri “Apostulli”, vëllimi i parë i një biografie të re për Fan Nolin, shkruar nga gazetari i mirënjohur, Ilir Ikonomi.
Ikonomi thotë se ka punuar për këtë libër prej gati shtatë vjetëve dhe se ky vëllim ka shumë fakte të reja, detaje dhe një këndvështrim të ri.
Ikonomi tha se ky është vetëm vëllim i parë i librave për Nolin dhe përqendrohet vetëm në jetën e tij në SHBA. Ai tha se Noli ishte një thesar dhe inovator i madh. Sipas Ikonomit, Nolin, edhe pse prift ortodoks, shkonin në Boston tek kisha ta dëgjojnë edhe shqiptarë myslimanë.
“Fetë nuk janë të liga, por siç ua mësojnë shqiptarëve të farmakosura dhe të shtrembëruara janë të rrezikshme për vdekje”, tha thënë Noli, e tregonte autori i librit Ilir Ikonomi.
Për të pranishmit promovimi i librit në Shkup, në muzeun e një shenjtoreje katolike, për një prift ortodoks, tregon dëshminë që e ka theksuar edhe vetë Noli, se për shqiptarët rëndësi ka më shumë gjuha e pastaj të tjerat.
Në këtë vëllim prej 430 faqesh, gazetari Ikonomi jep një përshkrim realist dhe me ngjyra të gjalla të Fan Stilian Nolit, në periudhën që fillon me arritjen e tij në Amerikë në vitin 1906 dhe mbaron në vitin 1920, kur ai u largua për në Shqipëri.