Kryetari i Aleancës për Shqiptarët në Maqedoninë e Veriut, Zijadin Sela, ka akuzuar kryeministrin në detyrë të Kosovës, Albin Kurti, se ka ndikuar drejtpërdrejt në fuqizimin e partisë maqedonase VMRO-DPMNE, përmes përkrahjes së kandidaturës së Arben Taravarit për president të shtetit.
Në një intervistë për emisionin “Këndi i Debatit” në Tëvë1, Sela zbuloi se Kurti i kishte propozuar që Taravari të dilte kandidat për president, në një takim të zhvilluar më 4 janar 2024 – pak kohë para se të shpërthenin përçarjet brenda koalicionit shqiptar në Maqedoni.
“Një prej faktorëve që VMRO është kaq e fuqishme sot është edhe Albin Kurti. Me idenë e nxjerrjes së Taravarit për kandidat për president, ai ka ndihmuar indirekt përçarjen e faktorit shqiptar. Albin Kurti duhet t’u kërkojë falje shqiptarëve të Maqedonisë për situatën politike të krijuar,” deklaroi Sela.
Sipas tij, ndonëse nuk kishte kundërshtim personal ndaj kandidimit të Taravarit, çështja duhet parë në një kontekst më të gjerë strategjik për interesat e shqiptarëve.
“Në takimin e fundit që kam pas me z. Kurti më 4 janar 2024, para se të ndodhin problemet brenda për brenda, më është shtruar teza: ‘Ç’mendon ta bëjmë Taravarin kandidat për president’. Unë s’kam gjë kundër, por shtrohet pyetja: a duhet të kemi kandidat shqiptar për president?”, tha ai.
Sela theksoi se vetë Kurti, në të kaluarën, kishte bërë thirrje që vota shqiptare të mos shpërndahej në mënyrë që i ndihmon palës tjetër.
“Kam thënë: kujdes, se kjo del nga goja e një politikani që pesë vjet më parë ka bërë thirrje që vota shqiptare të shkojë për shqiptarët – por në rrethana të tjera,” u shpreh lideri i Aleancës për Shqiptarët.
Deklaratat e Selës vijnë në një periudhë tensioni të lartë në skenën politike shqiptare në Maqedoninë e Veriut, ku ndarjet dhe lëvizjet e fundit kanë lënë pasoja të dukshme në përfaqësimin politik të shqiptarëve, ndërsa VMRO-DPMNE ka dalë përfituese në pushtet.