Kryetari i Aleancës për Shqiptarët në Maqedoninë e Veriut, Zijadin Sela, ka zbuluar se kryeministri në detyrë i Kosovës, Albin Kurti, i kishte propozuar kandidimin e Arben Taravarit për president të Maqedonisë së Veriut.
Sela ka dhënë detaje për këtë bisedë gjatë paraqitjes së tij në emisionin “Këndi i Debatit” në Tëvë1, duke treguar se propozimi i Kurtit ishte bërë gjatë një takimi më 4 janar 2024.
“Në takimin e fundit që kam pas me z. Kurti më 4 janar 2024, para se të ndodhin problemet brenda për brenda, më është shtruar teza ‘ç’mendon ta bëjmë Taravarin kandidat për president’. Unë s’kam gjë kundër, por shtrohet pyetja a duhet të kemi kandidat shqiptar për president,” ka deklaruar Sela.
Ai shtoi se për të personalisht nuk do të ishte problem ta kandidonte Taravarin, por theksoi se ka argumente pse shqiptarët nuk duhet të kenë kandidat për këtë post në rrethanat aktuale.
“Kam thënë: kujdes, se kjo del nga goja e një politikani që pesë vjet më parë ka bërë thirrje që vota shqiptare të shkojë për shqiptarët, por në rrethana të tjera,” theksoi lideri i Aleancës për Shqiptarët.
Deklaratat e Selës vijnë në një kohë kur skena politike shqiptare në Maqedoninë e Veriut po kalon përçarje dhe ripërpozicionime pas zgjedhjeve të fundit.