Kreu i BDI-së, Ali Ahmeti, ka reaguar me forcë pas skandalit të fundit në Kumanovë, ku gjatë një ndeshjeje basketbolli u dëgjuan thirrje të rënda me përmbajtje raciste dhe antishqiptare. Ai shprehu solidaritet të plotë me indinjatën e qytetarëve, duke theksuar se problemi nuk qëndron vetëm te incidenti i fundit, por te një fushatë e përditshme, sistematike, që synon të zhbëjë çdo arritje të shqiptarëve në Maqedoninë e Veriut.
“E kuptoj dhe e ndaj mllefin tuaj miq, jo vetëm nga klithmat e urrejtjes në Kumanovë, por edhe nga përbuzja e përditshme ndaj barazisë, marrëveshjes së Ohrit, gjuhës shqipe, flamurit kombëtar, përfaqësimit të drejtë dhe afrimit tonë me Europën,” – deklaroi Ahmeti.
Ai e ktheu reagimin në një thirrje të qartë politike për mobilizim qytetar më 19 tetor, kur Maqedonia e Veriut do të zhvillojë zgjedhje parlamentare.
“Është koha t’i thuhet njëzëri dhe masivisht: MJAFT MË! Mjaft përbuzjes, ofendimeve, nënçmimit, përkuljes, përndjekjes dhe eksperimenteve të vazalitetit. Më 19 tetor, populli do flasë shurdhueshëm zëshëm kundër këtij devijimi të rrezikshëm drejt lindjes autoritare,” u shpreh ai.
Ahmeti paralajmëroi se çdo përpjekje për të zhbërë ekuilibrat e ndërtuar me shumë mund përmes Marrëveshjes së Ohrit është një kthim mbrapa dhe një tradhti ndaj rrugës europiane të vendit.
“Po ndodh populli… bashkë,” përfundoi ai, duke sinjalizuar nisjen e një mobilizimi të gjerë kundër çdo forme të diskriminimit dhe përjashtimit politik të shqiptarëve në Maqedoninë e Veriut.