Një mbishkrim me përmbajtje të rëndë urrejtjeje, i shkruar në stacionin e autobusit para konviktit “Goce Delçev”, ku figuronin fjalët “Smrt za Shiptari”, ka qarkulluar për ditë të tëra në rrjetet sociale, pa u pastruar nga institucionet përkatëse.
I revoltuar nga neglizhenca dhe nga mesazhi i papranueshëm, Ylli Pacuku ka vendosur ta heqë vetë mbishkrimin.
“Prisja ta pastronin, por meqë qëndroi ende, e pastrova vet. Nuk dua të kaloj çdo ditë në një vend ku kam pritur autobus, e të shoh fjalë që s’kanë vend as në hapësirë studentore, e as në këtë qytet”, shkroi ai.
Pacuku u drejtua edhe autorëve të mbishkrimit, me një mesazh të prerë:
“E sa u përket atyre që i shkruajnë këto… ndoshta është koha të investojnë më shumë te mendja sesa te markerat.”
Veprimi i tij është përshëndetur gjerësisht në rrjetet sociale, ku shumë qytetarë kanë kërkuar më shumë reagim institucional ndaj gjuhës së urrejtjes në hapësirat publike.