Mendi Qyra dorëzon nënshkrimet për kandidaturën e pavarur në Strugë, me mbështetje nga VMRO dhe VLEN
Kandidati i pavarur për Komunën e Strugës, Mendi Qyra, ka dorëzuar zyrtarisht nënshkrimet e mbledhura nga qytetarët për të konfirmuar kandidaturën e tij. Edhe pse Komisioni Qendror i Zgjedhjeve nuk kërkon më nënshkrime nga kandidatët e pavarur, Qyra theksoi se e ka bërë këtë hap për të dëshmuar se miratimi i qytetarëve është parimi më i vlefshëm në një proces demokratik.
“Sot bëra një hap të rëndësishëm në rrugëtimin tim si kandidat i pavarur për Komunën e Strugës, bashkë me mbështetësit e mi deponova zyrtarisht nënshkrimet e mbledhura nga qytetarët që më dhanë besimin e tyre. Këto nënshkrime nuk janë vetëm një procedurë formale, por një dëshmi e qartë e besimit, mbështetjes dhe dëshirës për ndryshim në Strugë,” ka deklaruar Qyra.
Ai njëkohësisht ka shprehur shqetësimin e tij për mënyrën e organizimit të procesit zgjedhor, duke theksuar se kërkesa për vetëm dy nënshkrime për kandidatët e pavarur mund të krijojë një listë të gjatë kandidatësh dhe të shkaktojë konfuzion tek votuesit.
Megjithëse Qyra hyn në garë si kandidat i pavarur, burime lokale tregojnë se pas tij janë rreshtuar strukturat lokale të VMRO-DPMNE-së dhe VLEN-it, të cilat e shohin kandidaturën e tij si një opsion të përbashkët në zgjedhjet për Strugën.
“Ky është vetëm fillimi, së bashku do ta ndërtojmë Strugën që e meritojmë,” përfundoi Qyra në postimin e tij.