Prindërit e foshnjës 7 muajshe e cila ndërroi jetë një muaj më parë në Klinikën e Fëmijëve kërkojnë përgjegjësi. Ata shprehen të revoltuar me deklaratën e ministrit të Shëndetësisë, i cili dje tha se “për fat të mirë nuk ka gabim mjekësor dhe se fëmija është dërguar vonë për kurim”. Prindërit thonë se para se ti përkeqësohej gjendja shëndetësore foshnjës ata e kanë dërguar në spital, por mjekët e kanë “shëtitur” nga klinika në klinikë dhe e kanë lëshuar për kurim shtëpiak.
“Si ta komentojë deklaratën ‘për fat të mirë’ dhe kur ai thotë se fëmija është dërguar vonë në Klinikë. Si është vonë, kur unë para dy ditëve e kam dërguar dhe më kanë dërguar nga njëra në tjetrën Klinikë, dhe në fund na lëshuan në shtëpi. Do të kërkojë përgjegjësi deri në fund. Pse të hënën neve na kanë lëshuar në shtëpi, pse specializantët apo specialistët nuk kanë vlerësuar se fëmija duhet të hospitalizohet, për këtë kërkojë përgjegjësi”, tha Vllatko Tërpkovski, baba i foshnjës.
Kanë reaguar nga LSDM. Opozita thotë se fatkeqësitë në shëndetësi nuk duhet të fshihen, dhe për këtë kërkojnë përgjegjësi nga ministri i Shëndetësisë dhe drejtori i Klinikës së Fëmijëve.
“Kjo është e papranueshme ministër i Shëndetësisë, Taravari, po flasim për fëmijë, këto janë shifra tragjike, bashkë me drejtorin e Klinikës për sëmundje të fëmijëve, Memedi, duhet të dilni dhe të jepni dorëheqjen. Spitalet janë të stërmbushura me furnizime bazë mjekësore, listat e pritjes janë të mëdha dhe drejtorët e sapoemëruar po frikësojnë punonjësit e kujdesit shëndetësor në mënyrë që ata të mos flasin publikisht për problemet e kujdesit shëndetësor”, thonë nga LSDM.
Prindërit e foshnjës 7 muajshe edhe më herët janë ankuar se foshnja është refuzuar të shtrohej në spital edhe përkundër gjendjes jo të mirë, ndërsa është pranuar vetëm pas 48 orëve kur gjendja u vështirësua tej-mase. Ministria e Shëndetësisë pati theksuar se foshnja ka ndërruar jetë si pasojë e sindromit serioz i cili ka përfshirë më shumë organe./Alsat.mk