Rusia ka thënë se një sistem kyç i mbrojtjes ajrore dhe një bazë ajrore në rajonin Kursk janë goditur nga Ukraina me raketa Atacms të SHBA-së.
Deklarata e Ministrisë ruse të Mbrojtjes, që konsiderohet e rrallë që ta pranojë një dëm të tillë, erdhi pasi Ukraina pati lajmëruar se ka goditur caqe në rajon.
Ndërkohë, autoritetet në Ukrainë kanë thënë se Rusia ka lëshuar një rekord prej 188 drona në një sulm të hënën.
Tensionet janë në nivel të lartë që kur SHBA-ja e lejoi Ukrainën t’i përdorë raketat Atacms mbi caqe brenda Rusisë, si përgjigje për vendosjen e trupave verikoreane në Rusi, raportoi BBC.
Sulmet e para me Atacms në territor rus u raportuan të martën e kaluar, kur Rusia tha se copat që ranë shkaktuan zjarr në një objekt ushtarak.