Lubeten, 12 gusht 2025 – Sebar Mustafa ka bërë publike dorëheqjen e tij nga pozita e kryetarit të nëndegës së Alternativës në Lubeten, duke theksuar se ky vendim vjen pas dhjetë vitesh kontribut e angazhim në shërbim të fshatit.
Në njoftimin e tij, Mustafa thekson se së bashku me disa bashkëpunëtorë ka vendosur të largohet nga subjekti politik Alternativa dhe koalicioni VLEN, duke e konsideruar këtë hap të domosdoshëm pas një zhgënjimi të thellë.
“Pas 10 viteve punë të palodhshme për Lubetenin, më 12.08.2025 vendosëm të japim dorëheqje. Unë kam dhënë dorëheqje nga pozita e kryetarit të nëndegës së Alternativës në Lubeten dhe kam ndërprerë çdo lidhje me Alternativën dhe koalicionin VLEN,” shkruan Mustafa.
Ai akuzon drejtuesit aktualë të subjektit për shpërfillje ndaj aktivistëve dhe për mospërmbushjen e premtimeve, duke përmendur si shembull kërkesën për hapjen e ambulancës në Lubeten para zgjedhjeve lokale – një premtim që sipas tij nuk u realizua.
“Meritokracia nuk ekziston dhe punësimet e premtuara u kthyen në shpërndarje për njerëz të zgjedhur, jo për ata që e meritojnë. Nuk kam ndërmend të jem fasadë për interesat e ngushta të disa individëve që shohin vetëm karrigen e tyre,” shton Mustafa.
Në fund të njoftimit, ai falënderon banorët e fshatit për mbështetjen dhe premton se zëri i tij për Lubetenin nuk do të shuhet, pavarësisht partive apo koalicioneve
