Maqedonia e Veriut do të emërojë ambasadorë të rinj në katër misione diplomatike – në Arabinë Saudite, Danimarkë, Suedi dhe Shqipëri.
Disa prej të emëruarve janë ish-deputetë, ndërsa të tjerët diplomatë me përvojë që kanë udhëhequr më parë ambasada, përcjell INA.
Sipas informacioneve të Televizionit Telma, para rreth dy javësh janë miratuar katër emra:
Salim Sulejmani, ish-deputet i Aleancës për Shqiptarët (nga krahu i Arben Taravarit), është caktuar ambasador në Arabinë Saudite, në ambasadën e re të hapur në Riad.
Fadil Zendeli, ish-deputet i Lëvizjes BESA, është emëruar ambasador i ri në Danimarkë.
Në Suedi, do të emërohet Ivica Bocevski, i cili më parë ka shërbyer si ambasador në Brazil.
Ambasadën në Shqipëri do ta udhëheq sërish Vele Trpevski, i cili ka qenë ambasador në Tiranë edhe më parë, si dhe më herët në Australi.
Vendi i ambasadorit në Greqi (Athinë) ende nuk është plotësuar, ndërsa jozyrtarisht përflitet emri i një drejtori të një agjencie të njohur të marrëdhënieve me publikun. (INA)