Stuhia që përfshiu dje rajonin e Shkupit la mbrapa vetes dëme të shumta materiale. Stuhia e mbrëmshme dëmtoi shumë makina, rrëzoi shumë pemë e shtylla elektrike, ndërsa si pasojë shumë qytetarë mbi 12 orë mbetën pa energji elektrike.
Ekipet e elektrodistribuimit gjatë gjithë natës kanë punuar për sanimin e defekteve. Një ndër rajonet më të prekura ishte ai i komunës së Gazibabës. Qytetarët e këtij rajoni thonë se paralajmërimet për mot të paqëndrueshëm po i mbajnë ata në ankth e frikë për cdo pasdite të paralajmëruar me rrebeshe shiu.
“Moti i keq, dje tek ne, të gjithë çatinë e garazhës e ka rrëzuar në oborr këtu. Edhe llamarinat te shtëpia atje, edhe çatinë, i rrëzoi, edhe te ndërtesa që është afër meje të gjithë çatinë e rrëzoi poshtë. Ja, mundohemi të bëjmë diçka vetë, por nuk shkon…Nuk e di frika është e madhe, paniku, nuk e dimë si do të jetë. Nuk erdhi askush të na vizitojë nga autoritetet”, tha një qytetar.
“Çatia prej lartë fluturoi, bëri dëme. Këtu ka 5-6 vetura që janë goditur nga lartë. Për dhjetë e a 15 minuta, na bëri për askund. Edhe atje, nga ajo ndërtesa po ashtu ka rënë çatia, aty e shihni çatinë…”, u shpreh një qytetar tjetër.
“Dje që erdhi era, me shi, dhe hodhi nga lartë diçka, nuk e di çfarë kishin në ballkon. Ra poshtë. Gjithçka është bërë prej llamarine. Çfarë dhe si është, atë inxhinierët duhet të mendojnë se si duhet që të bëhet ajo lartë. Në këtë ndërtesën e re, njësoj”, theksoi një qytetar. Në ditët në vazhdim deri në mes të javës së ardhshme vendi do të përfshihet nga shira të rrëmbyeshëm lokalë bubullima dhe erë, por vetëm në orët e pasdites./Alsat