Fëmijët e tyre kanë 7 javë që po bojkotojnë mësimin.
Prindërit e nxënësve të shkollës fillore “Naim Frashëri” në Moranë, vazhdojnë me këmbëngulje të kërkojnë mëvetësinë e shkollës së tyre nga ajo qendrorja në Studeniçan.
Ata konsiderojnë se i plotësojnë kushtet që shkolla të funksionojë më vete.
Kryetari i Komunës së Studeniçanit, Azem Sadiku, thotë se edhe ai është në anën e prindërve, mirëpo shton se duhet të gjendet metodë tjetër për të shprehur revoltën dhe jo bojkot të mësimit.
Azemi paralajmëron se nëse bojkoti vazhdon, nxënësit do të jenë të detyruar të hyjnë në provim në çdo lëndë, ose ka shanse ta humbin vitin shkollor.
Ministrja e Arsimit, Vesna Janevska, javë më parë në emisionin Click Plus në TV21, deklaroi se nuk ka asnjë logjikë kërkesa e prindërve për ndarjen e shkollës periferike nga ajo qendrore. Shtoi se mendon se prindërit janë të manipuluar politikisht dhe se kjo po shkon në dëm të nxënësve.
Përndryshe prindërit, në rast moszgjidhjeje, paralajmërojnë protesta edhe para Ministrisë së Arsimit dhe Shkencës.