Komisionerja Evropiane për Zgjerim, Marta Kos, ka deklaruar se mezi pret të vijë vjeshta për të hapur kapitullin e fundit në negociatat me Shqipërinë për anëtarësim në Bashkimin Evropian, një lajm ky që ka shkaktuar reagime të ndryshme në rajon.
Në një reagim personal, Valon Bela e ka përshëndetur përparimin e Shqipërisë, por njëkohësisht ka vënë në pah stagnimin e Maqedonisë së Veriut, e cila deri vonë ishte në hap me Tiranën në rrugën drejt BE-së.
“Urime Shqipëri! Marta Kos tha se mezi pret të vijë vjeshta për të hapur kapitullin e fundit me Shqipërinë. Po po, të fundit!” – shkruan Bela.
Ai ngriti kritika të ashpra ndaj qeverisë aktuale dhe atyre që ai i quan “vlenistë”, duke i akuzuar për mungesë të kulturës institucionale dhe paaftësi për të përmbushur premtimet e bëra për integrimin evropian.
“Çfarë na solli izolimi i vlenistëve që premtuan brenda 6 muajve ndryshime kushtetuese? Çfarë na sollën këta injorantë që nuk kanë kulturë institucionale, e jo më qasje evropiane në zgjidhjen e problemeve,” – thekson ai në reagimin e tij.
Sipas Belës, Shqipëria po ecën përpara me “shpejtësi marramendëse”, ndërsa Maqedonia e Veriut po mbetet pas, për shkak të klasës politike që ai e konsideron të papërgatitur dhe të paaftë.
“Sa për këta tanët, as nuk dinë, as nuk lejojnë t’u tregosh. Ç’na gjeti me këta injorantë svlenistë,” – përfundon ai, me ironi dhe zhgënjim të thellë ndaj udhëheqjes aktuale.