Kryetari i Lidhjes Socialdemokrate të Maqedonisë (LSDM), Venko Filipçe, ka deklaruar se kërkesat dhe deklaratat e kryetarit të BDI-së, Ali Ahmeti, janë të motivuara nga interesa personale politike dhe nuk kanë të bëjnë me realitetin multietnik të vendit.
Duke iu përgjigjur një pyetjeje të gazetarëve, Filipçe theksoi se LSDM ka bashkëjetesë shumë të mirë brenda partisë me qytetarë nga të gjitha komunitetet etnike dhe se karakteri multietnik e multikulturor i saj nuk do të ndryshojë.
“Ka njerëz edhe nga komunitetet e tjera etnike dhe karakteri ynë multietnik e multikulturor nuk do të ndryshojë, as nuk do të kultivohet në mënyrën që propozon zoti Ahmeti,” deklaroi Filipçe.
Ai shtoi se Ahmeti këto qëndrime i shpreh vetëm për përfitime politike në rrethanat aktuale, duke ironizuar edhe deklaratat e tij për shpërbërjen e ish-Jugosllavisë.
“Nëse mendon se në këtë mënyrë do ta shpërbëjë edhe Maqedoninë, mund t’i porosis se nuk do të fitojë kështu,” tha Filipçe.
Sa i përket kritikave nga VMRO-DPMNE, kreu i LSDM-së u shpreh se kjo parti duhet të fokusohet te përgjegjësitë e veta qeverisëse.
“Le të shikojnë oborrin e tyre dhe kuadrot me të cilat e menaxhojnë shtetin. Për fat të keq, qytetarët janë sjellë në buzë të varfërisë dhe kjo duhet të jetë shqetësimi i tyre kryesor,” theksoi ai.
Në fund, Filipçe nënvizoi se LSDM ka standarde të larta për përzgjedhjen e kuadrove dhe se partia po përgatitet për zgjedhjet e ardhshme, me synimin që pushteti t’u kthehet qytetarëve.